蜀府川鍋 (Closed)

早兩日朋友同我講油塘有間高質海鮮火鍋店，搞到我心思思想試下，今晚終於的起心肝黎試下。火鍋店門面好搶眼，黎遠已經見到紅當當招牌同埋古色古香既大門。一坐低，見到佢menu 推薦海鮮粥底火鍋，就試下佢啦！大蜆龍蝦粥味道鮮甜，因為用黎煲粥關係，龍蝦唔係話好大隻果啲，而係中size 但肉厚既龍蝦，咁樣煲落先夠鮮味。估唔到佢連大蜆都落得好梳爽，入面估計有8-10隻大蜆，每隻都有肉唔係得個殻架！由於我係蜆王，見到佢啲蜆咁肥美，我就叫多咗碟豉椒炒蜆，同樣地不負所望好好食，一上枱已經傳來陣陣咸香味，真係少啲鑊氣都炒唔出。桂花蚌爽口彈牙，一滾就熟，新鮮～新鮮大連活鮑魚（9頭）好大隻，肉質鮮美，食完好滿足！自家手打蝦滑墨魚滑手打的確唔同啲，彈牙不在話，食落仲好香蝦味同墨魚味椰青好甜，感覺店員應該有揀過熟同靚既先開比我地，因為我地嗌咗兩個都好甜，依家仲回味緊入面啲椰果肉總括黎講，大家都好滿意呢餐。