鼎王麻辣鍋 (The LOHAS) (Closed)

無得去旅行，勁掛住台灣嘅火鍋。依家香港開左高人氣過江龍——鼎王，點可以唔去試下呢！我哋點咗鴛鴦鍋。侍應好細心咁提醒我哋酸菜白肉中鍋嘅白肉係師傅新鮮加入去，要滾一陣先食。酸菜鍋入面居然仲有薯粉酸菜同港式酸菜唔同，佢係新鮮啲，酸酸地，好開胃，我食到停唔到。鴨血麻辣鍋，真係無得頂！ 豆腐同鴨血都好滑。有鼎王，唔使再因為掛住鴨血而買好貴嘅包裝台灣鴨血啦！嚟呢度可以食得勁滿足。一邊食一邊忍唔住係咁講：好正呀！仲要係咁加鴨血，因為實在太好味啦！ 老油條同平時香港食嘅油條唔同， 佢係偏脆口。淥一淥就食得，外軟內脆，好特別，一定要試！滷大腸頭， 本身都熟左，但侍應話都可以淥一淥先食，好好食。牛拼盤，一次過滿足你幾個「牛」願望，有唔同部位。重點係，每個部位都係靚肉，全部都好食。蟹膏滑，我第一次食， 口感偏軟稔，真係有蟹膏架！鴨血、豆腐、酸菜係90分鐘用餐時間內可以無限添加。侍應勁有禮貌，佢地會主動問我地是否需要加鴨血豆腐酸菜，緊係加啦，咁正！有得自助裝飯，米飯粒粒分明又彈牙！今日2款湯底都好無敵好食，鴨血、大腸頭、老油條都好有驚喜。 呢間餐廳坐得好舒服，食物又高質， 一定會encore !