鳥海山鐵板燒 (Moved) New Location

好耐冇食鐵板燒，朋友推介下試咗長沙灣嘅呢一間小店。餐廳座位唔算多，環境佈置好靚，枱與枱之間唔會太近，坐得舒服。主打鐵板燒，有幾款唔同嘅二人套餐，亦有其他單點食物。我哋點咗個兩人大蝦套餐，有比目魚、大蝦、安格斯牛柳粒、野菜、炒飯、沙律同埋味噌湯。🐠🐠比目魚 - 魚皮燒得好香脆，肉質十分嫩滑，平時唔太鍾意食魚嘅另一半都大讚。 🦐🦐大蝦 - 未食已經聞到陣陣香味，肉質好彈牙，好細心咁已經去咗殻，一食已經啖啖肉。🐂🐂安格斯牛柳粒 - 燒得啱啱好，唔會太生亦都唔會太熟，肉質保持鮮嫩juicy，食得出本身都係高質嘅牛。連埋香脆嘅蒜片一齊食，味道更加提升。🍚🍚除咗幾個主菜整得好食，一定要讚下，連炒飯同椰菜都炒得好好食。炒飯好香口，飯炒得乾身，粒粒分明。餐廳有bar枱可以近距離欣賞大廚烹調，不過記得訂位時預先講明。平日夜晚去食都見好多人幫襯，建議都係要訂枱，免得白行一趟。