四季‧悅 日本餐廳 (遠東金融中心)

Open Now

Now Closed

約咗一位好耐冇見嘅舊朋友食飯，呢位朋友在港島返工，而且出名忙收工夜。約佢食飯亦一定要在港島。為咗方便大家搭車，我做咗一輪資料蒐集，揀咗位於金鐘嘅四季悅日式放題。食物選擇唔係特別多，但係基本野一定有，而且都好齊。每人送一隻磯燒鮑魚，鮑魚有半個掌心咁大，都幾好肉。第一輪當然先叫刺身啦，刺身不過不失，有鮮味。壽司賣相亦唔錯，軍艦手卷樣樣都做得好精緻，而且都好足料。貴價小小嘅食材例如海膽，三文魚子等等都有齊。我比較欣賞佢哋貨真價實，收得呢個價錢就有齊咁多款食物，唔會樣樣都話冇貨，叫幾多上足幾多。熟食方面，最欣賞係西京燒同埋燒鰻魚。燒鰻魚表皮香脆，鰻魚汁甜甜地，幾惹味。西京燒係放題中比較少見嘅，因為都幾花功夫，甜甜地當中有滲出魚油嘅香味，好好食。其他食物其實都唔錯，但相對驚喜無咁大。佢哋嘅甜品亦都好有誠意，用個小奶樽裝住嘅牛奶奶凍，賣相好吸引。最後埋單一人四百幾蚊，放題來講唔算平，但係地點、環境、服務、食物選擇等等，都算係唔錯，算係值回票價。