沙田新強記燒鵝海鮮酒家

Open Now

Now Closed

今日難得同老公放假，去咗大圍呢間好多年歷史嘅酒樓，最重要佢唔係連鎖式嘅酒樓，佢有幾樣招牌菜就係乳鴿/燒鵝同埋雞粥。呢度點心即叫即蒸全部都好新鮮，而且都好多種類，聽聞佢哋啲小炒都好出色，不過今次中午時間食所以就冇嗌到小炒，淨係嗌咗點心。新強記點可以唔叫佢哋嘅招牌雞粥（沙田新強記雞粥）,我哋兩個人食所以嗌咗個細鍋，點知嚟到發覺原來咁大鍋，咁嘅價錢咁嘅size真係超值。講番個雞粥，超級甜好重雞味，唔係求其啲頭頭尾尾，入面好多雞肉。嚟到酒樓想知佢啲嘢好唔好食，試一試佢地啲燒賣就知。蟹籽燒賣皇~粒粒都超大粒，又好足料，d蝦超級彈牙，要幾啖先食得晒，因為好大粒。沙嗲金錢肚~佢哋啲金錢肚好爽口，沙嗲味好濃，而且個底做用咗我最鍾意嘅豆卜墊底，好野味。金蒜蒸排骨~粒粒排骨都有金蒜，仲要係好大粒，唔似出面咁又細粒份量又小。椒鹽鮮魷~老公突然話想食d炸物，所以就叫左佢地既椒鹽鮮魷，即叫即炸，d炸漿厚薄剛剛好，魷魚有底味，外脆內爽。食後感：依d小店真係要多d人支持，保留番佢地既味道，因為真係出面食唔到咁既質素同價錢。