南瀛水產

次次去日本都必定會去食磯燒海鮮，未有得返鄉下，就嚟呢間喺尖沙咀嘅磯燒店，過住口癮先。餐廳裝修好有日本磯燒店嘅感覺，餐廳入面仲有個大魚缸。嚟到梗係要食磯燒海鮮，我哋仲嗌咗少少其他嘢食試吓。先叫咗一杯熱情菠蘿燒酎，呢杯酒菠蘿味都幾濃，入面仲有菠蘿肉，酒味唔會好重，好啱女仔飲。海鮮沙律用咗沙律醋拌入，酸酸哋好開胃，另外入面仲有三文魚、油甘魚切粒，口感豐富。加拿大海膽，海膽極之鮮甜，喺香港好難食到咁新鮮的，完全唔腥唔苦，而且大份又creamy，海膽嘅味在口腔內一段時間先去，非常高汁岀色。唐揚炸雞，個雞炸得啱啱好，唔會過龍，外皮炸得又夠脆，雞肉多汁嫩滑，而且每塊都大大件，好抵食。主角磯燒食物叫咗甲羅燒同埋生蠔。呢度嘅店員會幫手燒埋，所以只需要坐定定係到等就有得食。生蠔有成隻手掌咁大隻，燒完都係脹卜卜而且好鮮甜。甲羅燒味道都唔錯，非常惹味。下次要同多啲朋友嚟食，咁又可以試多啲唔同嘅嘢。