先講述飲品價錢(原價): 熱飲$11/凍飲$13/紅豆冰$16
入到去，叫了常餐C，有牛油多士、火腿奄列、咖喱雞扒撈公仔麵，$26，以為好抵啦！原來呢度d餐係唔包飲品的。
再望細字(飲品一律半價)
就望望drink list，種類係有好多呀！我見有半價，飲紅豆冰都只係+$8，三分鐘後，侍應同我講，無紅豆冰。
中午時間連紅豆冰咁common都無，無你寫出來做乜。
算，再看drink list，叫了熱朱古力，有半價，即係$11/2，等於$5.5啦！看看記錄咭，點解侍應係寫$6呢？便搵侍應詢問
侍應A:係加6蚊架！
我: 但熱飲原價係$11，半價應是$5.5，為何是$6？？
侍應A: 我地呢度4捨5入
我: 任何一個餐牌、牆壁餐牌、或當眼處，都無寫是4捨5入，你點解會收我$6呢？咁我想搵你老細。
侍應A: (佢算識做，乜都攬上身)係我唔岩，我之前無講清楚
侍應B: (走埋黎)同佢取消佢囉！(串爆)
我:你咁樣唔岩嘛！陰D陰D就收多客人5毫(雖然5毫真係唔係多，但原則問題，一定據理力爭)(可能係午飯時間，佢唔想影響其他食客，最後改記錄咭為+$5.5)
講返個餐，個雞扒撈公(唔係丁，丁要+$3)OK啦！咖喱味都OK，雞扒都幾大件
多士係一整片開二，薄的，牛油都幾足，奄列就乾左D，但份量幾大。
食完個餐，埋單係$26+$5.5=$31.5，攞$40去找，個阿毛收銀仲要俾說話我聽
收銀阿毛: 我地呢度4捨5入架！
我: 我見唔到你地餐牌係咁寫喎！你搵出黎俾我睇呀！
疑似老闆: 俾佢啦！俾佢啦！仲態度惡劣地揚手叫我走啦！走啦！
當時真係火都黎埋，促成我第一次打去消委會投訴，點知........:(:(:(
是否官商勾結？？
消委會人員: 我會記錄底你嘅投訴，或會作出勸籲，咁即係消委會都無實權，真係廢廢地。
表面上，呢間係算平呀！午餐係$25(連湯)，但大熱天時，D客人都會加杯飲品，埋單咪又係過$30，呢D掩眼法，只係係度玩數字遊戲啫！
可能港島區D人唔置在一角幾毫啦！我都係返九龍食算吧！
詳細寫呢篇食評，係想多D人知道呢間店嘅騙人手法，唔好重蹈我嘅覆轍
提外話: 佢話4捨5入，我將單都係$31.5啫！十位數都未到5字，是否可以拍拍籮柚走人呢？
