去到11點幾仲有早餐供應（佢地既早餐係由7點供應到12點嫁，正！）
今次係我第一次去（同事們都覺得難以置信，係附近返左咁耐工，居然可以冇食過鼎鼎大名既瑞士咖啡室！我真係個大鄉里呀！）。
去到第一個感覺係好懷舊，好似返返去80年代咁！
叫左個早餐F，有牛油多士、西煎雙蛋同埋雪菜肉絲米粉，配埋凍飲先＄39，係中環黎講真係好抵食！
味道方面算唔錯，個牛油多士好脆、西煎雙蛋同埋雪菜肉絲米粉就不過不失啦。
下次想黎試試佢個瑞士常餐！同事們個個都話佢個瑞士汁好好食嫁！
最後想講既係呢d港式懷舊茶餐廳真係買少見少喇，大家要多多支持佢地，好好保留呢d香港既地道飲食文化呀！
