海底撈火鍋 (金巴利道)

Open Now

Now Closed

估唔到係尖沙咀新開的呢間海底撈竟然有lunch set，一於同同事一齊happy lunch hour啦！一出𨋢門，員工已經非常好招呼，入座後還提供圍裙、熱毛巾...等物品，難以想像我地係黎食火鍋，哈哈哈！餐廳環境舒適，座位寬敞，唔會坐得好迫。我地一行四人，叫了巴沙魚、羊肉及西班牙梅臀肉三個套餐連拼盤，已經好夠食。湯底選了四格湯底，有蕃茄、清油麻辣、菌湯底及清水，湯底味道各有特色。但火鍋調味料就要另外收費，但湯底本身味道濃，我就覺得唔駛調味料都好夠味。啲食材新鮮乾淨又整齊，巴沙魚煮一陣就ok，口感嫩滑，比預期好食。我本身唔係好喜歡食羊肉，嫌有陣騷味，但呢度的羊肉騷味唔係好濃，係我接受到的範圍，肉質柔嫩，好食。但梅臀肉就一般，口感較鞋但勝在新鮮。至於3個拼盤材料豐富份量又多，有凍豆腐、午餐肉、魚蛋、鴨血、海帶及多款蔬菜等。而且生果、小菜及糖水都係任食。仲有重頭戲係這位師傅表演拉麵，真佩服佢可以係咁窄範圍表演。即整麵條，口感煙韌有彈性，直得一嚐。用餐全程都非常愉悅，服務周全又細心，食材新鮮質素高，係度食飯真係有種尊貴的享受。