一場來到九龍城冇理由唔食返餐泰國菜呀
見到呢間咁多食評梗係要一試啦
最後揀咗豬頸肉配海南雞飯同咖喱炒蝦配薄餅。
每個餐都個送一個冬瓜湯，個湯細細碗、望落去平平無奇，以為一般茶記餐湯貨色啦，點知一入口就停唔到口，冬瓜嘅清甜配埋辣辣哋嘅胡椒，即時醒胃
有啲似胡椒豬肚湯嘅味道，估唔到一個送嘅餐湯都咁surprise。令人想再飲多碗
我哋另外加咗鳳爪同串燒。
鳳爪辣度十足，但酸度略嫌唔夠，作為前菜開胃都唔錯嘅。
串燒加上袐製沙嗲汁，豬串燒比雞串燒好食。
呢個咖喱蝦超正
好有喺泰國先食到嘅味道！個咖喱食到停唔到口，又甜又辣，大蝦夠彈牙，無論配薄餅定飯都係一流
薄餅熱辣辣，煎到好香脆，配埋咖喱食到舔舔脷
配油飯反而爭啲，配返普通白飯就更加索汁，真係咖喱汁都撈埋。
果然食泰國菜唔可以唔食咖喱！
因為個咖喱實在太出色，豬頸肉海南雞飯被比下去，但個豬頸肉都唔弱呀，煎到香脆可口，配埋個汁送飯一流
海南雞就普普通通，唔太突出。
奶茶、龍眼冰中規中矩，都係普通泰國餐廳嘅味道。
食緊飯途中已經盤算緊下次一定要再嚟，希望可以多啲人一齊嚟叫多啲餸試多啲啦
