大渣哥茶記 (Closed)

終於輪到大渣哥。呢排間間食肆都吊緊鹽水，大渣哥依然其門如市，次次經過都見人龍，認真犀利👍。當然，嚟得幫襯嘅人，大部份都志不在食物，而係嚟食嗰份同仇敵愾。開業前睇過篇報導，話佢哋請咗澳牛嘅廚師過嚟幫手，當時對佢哋確實係有啲期望嘅，於是第一次幫襯，就叫咗個同澳牛有九成相似嘅茶餐。成個茶餐最好食嘅係片丹麥多士，雖然講唔上好出色，但係牛油味都算香濃，唔錯；叉燒湯意粉則屬正常味道，不過叉燒略嫌偏瘦；至於火腿炒蛋就比較弱，炒蛋有啲嚡口，唔夠滑，蛋味亦不足。總括嚟講，呢個茶餐係正常茶餐味道，如果唔係拎佢同澳牛比較，其實係合格嘅。