六両三 (Closed)

初二晚上，想搵間仍然開門嘅食肆已經唔容易，想搵間仍然開門嘅黃店就更加難，結果輾轉之下嚟到尖沙咀，幫襯咗呢間。雖然係食台灣菜，但係店內嘅裝修就走日本風格，感覺簡約舒服。牆上面有一幅好大嘅掛飾，解釋小店點解唔落味精，令人印象好深刻👍。兩個人食，叫咗川味紅燒牛肉麵，川味紅燒三寶牛肉麵同甜不辣，我食嘅係紅燒牛肉麵，最初都驚川味會好辣，但係原來只係 BB 辣😂；麵質比較硬同煙韌，而且有啲岩岩巉巉，較似手工麵，非常好食；牛肉味道雖然唔算好濃，但係煮得非常腍，不錯；最出色係個湯底，味濃但又唔會死鹹，當我食完成碗麵，湯底都幾乎一飲而盡😆。值得一提係檯面有紮頭髮嘅橡筋免費供應，以免長頭髮嘅顧客食湯麵時頭髮食先，非常窩心，絕對稱得上係良心小店。 另外，當晚我居然冇不停扯水，證明真係冇落味精，又係值得一讚👍。