稻八日式火鍋炸物放題 (Closed)

我自己覺得，大埔呢度，三百幾蚊，可以食一個日式嘅放題火鍋，其實都算幾唔錯。我自己特登慕名而來，係為咗佢個芫荽湯底，我自己根本就係一個徹頭徹尾嘅芫荽黨黨員，所以比佢哋呢度嘅湯底吸引咗。由火車站行過嚟呢度，我就建議喺太和站，穿過商場，一條直路入去翠樂街再轉個彎入舊墟直街就會搵到呢間餐廳。依家好多火鍋店都會有刺身作為火鍋前嘅食物，佢呢度都唔例外，但係就要食一個貴價嘅餐先至可以免費食佢嘅刺身。環顧餐廳，我覺得配料非常充足，有各式各類唔同嘅丸、亦都有好多款菜，絕對食得飽。芫荽湯底嚟到，芫荽非常香濃，我自己個人猜測，佢一定係又將芫荽放入攪拌機，以製成呢一個湯底，食落去嘅時候，芫荽味唔算特別重，我估計佢應該都係想遷就返一大班人裏邊，有啲人可能唔太好芫荽，但係我呢個芫荽黨員，就期望有更加重嘅芫荽味。我叫咗佢一個澳洲和牛嘅套餐，有齊好多款唔同嘅牛肉，又有下腹腩，又有好多款唔同嘅部位，非常好食。呢餐總括而言來講，我係幾滿意嘅。