非凡小廚 (Closed)

平時一向好少去土瓜灣，朋友介紹之下去到一間小菜館叫做「非凡小廚」，試吓佢啲撚手小菜。 餐廳環境設計簡約，而座位空間舒適寬敞，可以一邊睇住電視一邊食飯，最適合追劇集嘅電視迷們。 秋天梗係要滋潤吓喉嚨啦，首先就點左三個唔同款式嘅湯羹。「魚肚粟米羹」一聽個名就知養顏，入面嘅魚肚份量都比較多，好新鮮嘅味道。「雞蓉粟米羹」入面有我最鍾意嘅雞粒，咬落去肉質滑嫩爽口。 「西湖牛肉羹」新鮮嘅牛肉粒啖啖肉，非常足料。小菜方面，我哋就叫咗五款用嚟送飯。當中我至愛嘅「乾煸四季豆」炒得好香，好有鑊氣，好入味嘅肉碎粒送飯簡直一流，而且四季豆炒得好林，食落去更有爽口嘅口感。 當然唔少得叫我最鍾意嘅海鮮「金蒜蒸中蝦」，蝦肉非常新鮮，即叫即整，肉質爽口，加埋底下嘅粉絲索晒海鮮嘅精華味道，簡直冇得頂。另外叫左再「大漠風沙雞」、「酥炸大腸」同埋「海棠豆腐」，咁豐富嘅小菜，好快我哋一人就送咗兩個白飯了。 最後當然唔少得要點餐廳嘅招牌甜品「非同凡響炸雪糕」，外皮炸成脆卜卜，食落去外脆內軟，入面竟然係凍冰冰嘅雪糕，呢個甜品非常特別。