一家

Open Now

Now Closed

約左個喺筲箕灣住嘅朋友食晚飯，佢帶我去形薈商場一間叫「一家」嘅上海菜館食。一入去就比餐廳環境吸引住，有好多打卡位。樓底高唔會逼，坐得舒服。臭豆腐好「香」，隔住口罩都聞到😹。一嚿都幾大又厚身，炸成金黃色，外脆內軟，唔會過油。點埋辣醬同甜醬食更惹味。雞絲粉皮粉皮多到好似一碗麵，好粗，食落好有口感。青瓜爽脆。小籠包皮薄得黎唔易穿，用筷子夾起都唔會好快穿。醋夠酸，點埋醋食重正！外婆紅燒肉流心蛋流心蛋細細粒圓轆轆好得意😘，蛋黃重食到甜甜地。除左紅燒肉同流心蛋，原來仲有魷魚。紅燒肉肥瘦分明，腍而入味～海鮮澆頭麵有魷魚、蜆、蝦、帶子等海鮮。魷魚彈牙；帶子好滑；蜆夠鮮味。另有什菌和翠綠小唐菜。麵同餸嘅份量好足，頭先食左咁多野搞到食唔曬個麵🙈。最後嗌埋個甜品作結。炸芝麻團唔油膩夠晒熱。外層芝麻夠香又鬆脆，中間糯米夠煙韌。因為夠熱，令入面嘅芝麻呈流心效果。