謝謝儂 (東港城) (Closed)

今日同朋友去左坑囗東港城食上海野。初初以為間野執左，原來佢係馬莎對面開番。新舖頭裝潢掛有舊上海旗袍女人壁畫。在粗布燈罩折射的柔光下 ，黄澄熱茶在餐桌上暈下的光圈，好似坐係 cafe。兩個人點了四菜一麵，上菜幾快，菜色份量幾大。最先上的係前菜三小拼($88)。三小拼有肴肉，排骨，烤麩。酸、甜、野味，幾令人開胃。肴肉係滿滿骨膠原，正～清炒時蔬係炒小白菜($65)。家常菜要做得好，很難。今晚食的小白菜同洋蔥蒜片爆炒，有獲氣。小白菜蒜香脆嫩，好快兩個人就消滅成碟菜。第二碟係黑醋排骨($76)。黑醋汁濃稠度恰到好處，紫洋蔥，菠蘿，排骨掛上甜醋汁，好夾。排骨多肉，外焦內軟，食肉獸之愛。第三碟係謝謝儂小籠包($36)。一口咬下湯包的暢快感，湯汁混合肉薄皮，係小籠包的迷人處。小籠包下有一片青瓜解膩。最後上桌的係安格斯肥牛炒粗麵($88)。一碟有三份一係肉，芽菜都好脆似薯條，同掛滿豉油的粗麵一齊食，咬落去肉汁溢下，有肉香，又脆又煙韌令成碟菜口感提升。