翡翠潮州小廚 (Closed)

作為一個青衣島民，在下親眼見證住呢個青衣城一期地下巨型鋪的興衰，由Pizza到酸菜魚都接連易手，岩岩新開的潮洲滷水，要試試佢實力。呢間潮洲菜走中式酒樓路線，一入大門口有幅大型肥鵝水墨壁畫，寥寥數筆已表達肥鵝的神韻，迅間令人進入食滷水鵝的狀態。我地柯打左個$298二人餐，諗住樣樣有d可以試下唔同野。胡椒豬肚湯湯微辣卻淡而無味，例湯水準，失敗！豬肚冇飛水有up味，失敗中的失敗！不過以例湯黎講係咁上下，無得要求太多......方魚蠔仔粥蠔仔毫無鮮味，方魚又唔脆口，成個潮洲粥口味偏淡，勉強算合格。金銀蛋浸娃娃菜呢味金銀蛋浸娃娃菜水準還可以，菜夠甜，金銀蛋香，味道水準以上，好味未滿。龍鳳雙球呢味真係有水準，蝦者龍也，雞者鳳也，用豉油爆香，仲有伴碟珍珠葉，好好味！鴛鴦水晶包甜品係鴛鴦水晶包，懶細心後上，係就係熱辣辣，但結果個水晶味係穿嘅？紅豆餡漏曬出黎，失敗！留意返晚巿係要收茶介加一。整體而言，呢間新派潮洲菜份量較少，如要走精緻路線，質素就一定要再進一步。二人餐埋單落樓要$378，咁嘅質素真係偏貴囉。