門口叢林亭院擺設好靚，俾我的感覺好幽靜舒服。裏面樸素簡約，擺設唔花巧，坐得舒適寫意。只有一張浪波型的壽司吧枱，亦係我最想坐的位置，因為可邊食邊欣賞師傅的手藝，是我最期待的一環。
睇咗嗰menu，晚上廚師發辧($1880/位)，師傅話內容大致喺咁，一定有多無少，就興奮。前菜好精美，一共有四款，有芝海老、昆布包櫻鱒魚、數之子和白現貝。最鍾意係數之子，啲魚籽極之爽脆，仲甜甜地。
蜆清湯好清晰，見到大大隻的蜆肉，又肥大又鮮美，正！師傅話無落鹽，所飲到都係蜆的鹹鮮，再加埋片柚子皮，清新鮮味，正！
輪到我最期待的刺身，好興奮！今晚有櫻鯛、白蝦、八間、赤貝和白子，五款都令我難忘。初初見到師傅切八間，我仲話係油甘魚，好瘀呀！食落去八間果然唔同，魚味重，又油又香，正！第一次食白蝦，細細隻，又黏滑又鮮甜，撈啲芥末食又有唔同，特別！
和食就有三款，每款都係用心之作：
1）白海老增夫：炸得好靚仔，成件金黃。原來用咗40幾隻白蝦加蛋整成，真係估唔到。口感好輕盈，味道好鮮。
2）昆布醬油燒鱈魚白：入口暖暖地，味道好甘鮮，好黏滑。
3）鮟鱇魚肝：入口即溶，甘香味留喺口中，好正！最鍾意加咗酸咪咪的酸汁，食落無咁漏，夾！
跟住就欣賞師傅握壽司。每件壽司已加了芥末和醬油，我就唔駛擔心。
1) 八角壽司：味道屬淡，原來是白身魚，肉質就微爽。
2) 針魚壽司：晶瑩剔透，師傅犀利呀! 。針魚都係屬淡味魚，清淡鮮味，肉嫩兼爽。
3) 金目鯛壽司：皮肉都紅紅地，口感爽嫩，味道鮮。
4) 關鯖壽司：一向對鯖魚無乜好感，但關鯖魚香味濃，又爽滑，好吃!
5) 帆立貝壽司：師傅包到好似一個豆沙包，有趣! 非常肥美，柔軟鮮甜，高質素！
6) 甘海老壽司：今次師傅就握到好似車軚呀，特別! 用咗三隻蝦包捲着壽司飯，每口都好黏滑，仲好有鮮甜味。
7) 吞拿魚壽司：分別有勁有魚油香的中拖羅壽司，肉嫩鮮美。跟住係大拖羅壽司配鹽，而唔係配醬汁，食落無咁漏。全片油脂滿佈，非常甘香，令我宜家都回味緊….最後醬汁漬赤身，好嫩滑柔軟，魚味仲幾濃，同平時食的赤身完全不同。
8) 北海道馬糞海膽卷：海膽份量好多，啖啖甘香，非常油潤，跟壽司飯和脆身的紫菜一齊食，簡直停唔到口。
麵豉湯熱辣辣，好暖身。湯內有蔬菜、魚肉、豆腐、京蔥等，味道鹹鮮，唔會好係平時飲的麵豉湯味道偏鹹，非常好飲！
最後梗係甜品，今晚係士多啤梨配自家製紅豆水羊羹，好精美。紅豆水羊羹好有紅豆的香甜，甜度岩岩好，同埋酸咪咪的士多啤梨一齊食，更岩!
