入到嚟，依一間私房菜有好多間房，坐得好闊落，傾偈都好舒服，唔會好似啲普通酒樓咁嘈。
🥢杏汁燉白肺湯
首先，我哋飲咗一個杏汁燉白肺湯，一個我好鍾意嘅養顏滋補湯。呢個湯燉到奶白色，好足料，有好香嘅杏仁味，非常香甜清潤。
🥢冰鎮鮑魚
鮑魚好彈牙，唔腥，食落口好鮮甜，唔點Wasabi豉油都好正。
🥢醬爆黃金蝦多士
蝦多士鋪有厚厚一層鹹蛋黃醬，鹹香惹味。加埋新鮮炸起嘅蝦多士，真係十分邪惡嘅人間美食！
🥢順德煎釀鯪魚
食完蝦梗係要食魚，就係食順德名菜。上菜嗰陣，原本以為食原條煎魚，點知內有乾坤！鯪魚肉好彈牙，加上外面煎到香脆嘅魚皮，食落口感更上一層樓。
1
🥢蝦乾魚肚燉芥菜
食完啲濃味嘢，當然要食返清清哋嘅菜。芥菜好清甜，而且煮到好腍。魚肚都唔腥，食落爽口，加埋清甜嘅魚湯，消濟一流👍🏻
🥢 XO醬海鮮炒飯
呢個炒飯海鮮配料都算多，而且炒得好乾身，加上微辣嘅XO醬，每啖飯都好香口！屋企人食完都讚不絕口。
🥢蛋白杏仁茶
甜品成為我今晚最愛😍 蛋白好滑，杏仁茶好香，成個糖水甜而不膩，一個非常滋潤嘅糖水，為今晚做一個完美嘅總結！
