四點金飯店 (Closed)

潮州菜的味道相對比較重和濃，間唔中食吓都幾好味，以前做過潮州菜館，知道潮州菜的功夫比較多，而食潮州獅頭鵝一定要食比較淋身的鵝肉，鵝味香濃又唔會好似鵝片咁硬。今次去咗新都城的四點金和媽咪撐枱腳，佢想食韭菜豬紅和蠔仔肉碎粥一碗，我就點咗一碟鹵水鵝肉，本身想再點一個菜，都係決定食埋食，餸菜每款都好大碟，到最尾都係要打包拎走。韭菜豬紅每塊都有咬口又大塊，豬紅味濃，媽咪鍾意。蠔仔肉碎粥好大碗，我地每人都添咗3小碗，蠔仔大大粒好有蠔味，配上胡椒粉少少辣味令粥味提升。鹵水鵝肉好入味，鵝肉比想像中淋身，送白飯好滋味，碟底仲有鹵水豆腐墊底，鹵水味入晒豆腐裡面，好味！最後仲點左一碗福果清心丸豆爽，白果和清心丸煙煙韌韌，甜度適中！