串Grill 自助燒烤專門店 (譽發廣場) (Closed)

自助燒烤餐廳愈開愈多，同朋友聚餐一個價錢可以任飲任食，有得玩又唔會太複雜就啱晒我呢D懶人。今日約左朋友嚟譽發廣場嘅【串Grill自助燒烤專門店】試下。星期六午市時段每位$198，可以食120分鐘。用QR code落單，串燒有豬牛羊雞、海鮮蔬菜、丸類腸類、甜點等40多款選擇。飲品除左一般汽水無糖茶外，有一系列鴻福堂樽裝飲品。坐低店員先上一碟Welcome串燒，再講解燒烤流程同介紹枱上面嘅醬料，都幾細心。上菜速度幾快，串好嘅串燒12串一兜，用木盤裝住，仲有鐵架可以五層疊起，唔怕放到一枱都係。只要將唯一鐵籤卡好喺燒烤機嘅鏈帶上，串燒就會自動反轉，如果大件嘅食物就唔好放得太密，唔係兩舊肉頂住轉唔到，就會一邊燒得過熟㗎喇。燒到咁上下掃番D燒汁，咁食落就更Juicy。食物方面，M6和牛牛柳質地軟腍，肉味香濃，燒雞翼外皮燒到卜卜脆內面嘅肉仍然好嫰。鯖魚大大件鮮味又唔易燒乾，台灣腸有D黑椒好惹味。豆卜燒到好香口，估唔到會咁好味。菠蘿睇起上嚟有D乾但食落非常多汁，最後食埋外脆內裡軟綿綿嘅雞蛋仔同燒烤必備嘅綿花糖就Prefect 喇。