1⃣️金菇+冬菇粗麵（$31）（秘製辣醬中辣）（腩汁）
呢度主打無味精，湯底揀左要腩汁，味道比較淡，另外辣醬係另外裝係隻羹到既，辣醬幾夠辣，伴隨住蒜香，唔錯👍冬菇大大粒，咬落有汁🤤仲有佢啲份量都幾多，冬菇有成四大件，金菇同埋麵都好多。
2⃣️豬紅+手打魚肉油麵（$31）（秘製辣醬中辣）（沙嗲汁）
豬紅有大約五粒，然後手打魚肉有四件，油麵份量都係好多。豬紅冇乜味，而手打魚肉係鯪魚肉，食落唔算係好爽口彈牙，但係都算幾滑幾有咬口。呢款湯底揀左沙嗲汁，個人覺得沙嗲汁好味過腩汁，呢度既沙嗲汁幾香同埋配埋辣醬食成個湯底更加惹味😋
3⃣️招牌鮮煎餃子（$40）
呢度既餃子有得揀韭菜餃或者椰菜餃，仲有得揀雙拼添。今次我就揀左雙拼。椰菜餃入面既料除左有椰菜之外，仲有啲木耳，食落好爽脆。而韭菜餃既韭菜同豬肉既比例啱啱好，唔會食落好肥膩，韭菜份量亦都夠，夠味。好欣賞呢度既餃子係，呢度既餃子啲皮好夠薄，煎出黎個底係真係薄脆😲而且咬落juicy。
4⃣️秘制辣魷魚（$35）
呢個比我想像中好食！魷魚面頭覆蓋滿沙嗲醬，仲有少少花生碎同埋蒜蓉粒係面，超級惹味，而且醬汁好濃稠，每條魷魚都沾上醬汁，個醬汁有啲似平時出去食串燒既時候既沙嗲醬。辣度好足夠，個人覺得呢個既辣度比起車仔麵既中辣更加辣🌶️但係辣得黎好惹味！超級推薦呢個魷魚🦑除左醬汁好正之外，呢度既魷魚都好爽彈，仲有好多添😚
5⃣️蒜泥白肉（$28）
呢個比較普通。肉係好薄切既，食落冇咩肥膩既感覺，雖然佢肥瘦既位置各半，但係食落都係有啲乾，同埋個人覺得蒜味唔夠重，如果蒜泥份量再澎湃啲會更好。
6⃣️爆漿阿華田西多士（$33）（轉朱古力榛子醬+$2）
成餐既重頭戲🤩上到枱已經期待感滿分💯西多士上面灑滿阿華田粉，勁邪惡😈中間係朗下朗下既煉奶，超滿。一切開，啲煉奶就係個缺口到流曬出黎🤤即刻吞左啖口水🤭西多士既外層係脆脆地既，入面夠鬆軟，夾層有得揀要傳統既花生醬，或者轉朱古力榛子醬，個人覺得阿華田配朱古力榛子醬會好夾，所以就轉左，事實證明，呢個決定係冇錯既😌阿華田粉、朱古力榛子內層、流心煉奶，呢三樣野加埋完全係冇得輸。
