潮味苑

Open Now

Now Closed

收工經過深水埗嘅時候，見到呢間潮味苑有唔少人買外賣加餸，店外已經見到唔少潮式鹵味，睇落都幾吸引，而且門口更有陣陣嘅香味傳出，反正到晚飯時間，就同埋朋友一齊入去打個靚冷。店內地方唔算好大，只係街坊小店，不過都有唔少捧場客。 見到唔少人都有叫墨魚、鹵水鵝、鵝腸之類既鹵味，一於都叫個鹵水細併，墨魚同鵝腸爽口彈牙，豬頸肉質結實香口，鹵水汁都幾入味，食得出用左唔少香料，都幾香。打冷又點可以唔食蠔餅？呢個蠔餅一上檯已經忍唔到口，係咁食食食！大大塊嘅好餅十足Pizza咁，足足有四大層，大份過坊間唔少店舖，蠔仔大隻又鮮甜，炸得脆卜卜，好鬼香口，雖然熱氣，不過真係必食！唔係間間打冷都有得食嘅潮州炒麵線，足料得嚟，好有屋企嘅味道，食落香口，朋友食左好幾碗！金不換炒薄殼米，聽講唔係成日有，係當造先有，咁啱今日有貨，咁好彩先食到，我就未食過薄殼，所以對於我嚟講都幾新奇，味道介乎於蜆仔同迷你青口之間，鮮甜惹味，同金不換好夾，非常特別。兩個人食咗三百零蚊，但食物嘅份量起碼有三四人份，味道又唔錯，性價比好高，下次嗌多啲朋友一齊share先得，真係飽到捧住個肚走。