生記粥麵 (Closed)

難怪說是不老店，味道不老，懷舊得來又好味。今日就係想揾一間呢d傳統得嚟又有質素的粥店。我最鍾意就係食豬膶粥，要整到嗰舊豬膶肥嘟嘟，咬落有爽脆又唔會搶咗粥嗰陣甜味，其實係要有一番好高嘅工藝先至可以做得到嘅。本身來都諗住食魚腩豬膶粥，但係話魚腩已經一早賣晒。原來係一件好搶手嘅，如果下次想食魚腩嘅話呢就一定要早啲嚟幫襯啦。最後就揀咗豬潤豬心粥，豬心又係我好鍾意食嘅內藏。首先講一講個豬膶先，真係整到有好飽滿，咬入去爽脆唔會太老，另外仲會比一碗葱豉油點，如果要加薑嘅話，加多一蚊。豬膶攞出黎再點埋啲薑蔥豉油一齊食，絕配。豬心都很不錯，一舊好大舊，咬落去都好爽，但豬潤都係正d，哈哈。至於粥底係好綿，唔會見到粒粒的米，因為已經煮到好綿，仲有淡淡粥香，飲口有粥的黏感，好正。