劉興記生煎包專門店

Open Now

Now Closed

自從呢間劉興記開咗之後，經常都會食佢嘅荃灣分店，因為食落好正宗，今日咁啱喺佐敦放工，見到又有分店，咁就梗係要試吓啦。呢間餐廳多數都要排隊，但係因為可能生煎包可以食得好快，所以通常等10至15分鐘就入得啦。我最鍾意呢間餐廳嘅地方，就係佢嘅豆漿可以任飲，夏天食飯成日都覺得好熱，通常都要叫好多杯嘢飲，但係佢有任飲嘅豆漿，可以慳返好多飲品錢呀。今日好熱，比較想食啲凍嘅嘢，所以就揀咗呢個雞絲粉皮，佢嘅麻醬份量啱啱好，而且雞絲份量都好多，夏天食落真係好消暑。而朋友就揀咗呢個炸豬扒菜飯，佢係第一次食呢間餐廳，但係佢都覺得好出色。豬扒炸得好香脆，而且份量好多，外脆內嫩嘅感覺好一流。試咗朋友一啖菜飯，菜飯煮得唔會好油，菜同飯嘅比例啱啱好，朋友都大讚話非常正宗。呢間餐廳而家已經成為咗連鎖店，但係試咗佢兩間分店，出品都好出色，下次有機會一定會再試其他分店啊。