永珍越南食館 (Closed)

今晚我們行完旺角花墟之後去咗附近周圍睇吓有咩好食，行到去花園街見到有間叫「永珍越南食館」嘅店內差唔多全店爆滿，應該食物出品都唔錯，所以我們就決定入去食晚餐！當時我們未諗到想叫咩食，見到隔離檯食緊嗰啲好似好好食同好吸引，所以我們就叫咗嚟食，蟹肉炒飯炒得好乾身同粒粒分明，蟹肉亦幾鮮味，再將舖面嘅豬肉鬆撈埋一齊食，令到味道更加惹味！泰式鹽燒珍珠鰂喺落單嗰陣店員好有禮貌咁同我們講話因為係即叫即燒，所以要等30分鐘，我們話：「好！無問題！」，珍珠鰂燒得好香氣撲鼻，塊魚皮係剝開咗，而且有大量嘅香蔥同乾蒜舖喺非常鮮甜嫩滑嘅魚肉上面，令到味道更加芳香惹味，而珍珠鰂嘅魚骨比普通鰂魚少，再沾埋泰式生蝦汁一齊食，令到魚肉嘅鮮味更加提升，真係超正呀！越式拼盤「大」嘅牛肉蝦片好香脆，牛肉嘅肉質好鮮嫩，越式炸蝦卷炸得相當酥脆香口，蝦肉亦好爽甜彈牙！越南火車頭湯河粉嘅材料有牛肉、牛丸、牛舌、牛栢葉等等等等⋯⋯真係相當豐富，河粉嘅麵質好軟滑，湯底嘅味道好清甜鮮味！