蟹慶 (Closed)

終於捱過疫情第5波，可以約下朋友食好野，日本蟹當然係首選啦！其實定食都幾多款幾吸引，但今晚目標非常清晰，食毛蟹！先點前菜，海之幸沙律 $98 好多刺身有三文魚 油甘魚 等等，配醋汁好清新。員工介紹今晚有時令沖繩獨眼龍生蠔，叫左半打 $498, 果然肥美爽口，肉質爽脆鮮甜，好大隻！過足蠔癮！主角原匹蒸活毛蟹，$1080 好多蟹膏，超鮮甜！蟹殼蟹腳已經被師傅好細心咁剪好，用手撐開就食得，蟹肉好甜好爽滑，點埋個蟹醋更滋味，絕對係品質同技術結合嘅傑作。蟹殼係師傅剪好上枱，一開就食得，肉質鮮甜多汁。想食埋海膽同toro 就要叫埋呢個海之幸卷，係軟殼蟹卷上面加上大量toro 蓉，蟹肉，海膽同三文魚籽，鮮味大結合！A5 和牛烏冬 $188 和牛脂味爆發，配合好多新鮮蔬菜同鰹魚湯底，幼滑稻庭烏冬，温和暖胃。蟹肉冷稻庭烏冬，加左蟹羔入去撈，配冷面汁，好香蟹膏味。海鮮新鮮有水準，店員服務好，師傅用心有技巧，值得一去再去。