餐廳擺盤有心思，將刺身同前菜放埋一齊，感覺好豐富。
深海池魚+ 真鯛刺身 + 磯燒帆立貝（$68/每款）
呢三款係是日推介，刺身每客有兩切，厚切有口感，深海池魚魚肉新鮮爽口，真鯛輕輕燒過，有油脂香味。
蟹皇醬燒蟹膏豆腐 $58
豆腐一啖一件嘅size，幾的骰精緻，蟹膏鋪喺豆腐上面，本身有啲怕會好腥，點知唔腥之餘仲幾鮮甜
火炙左口魚邊壽司 $56
平時其他餐廳只係微微燒一燒表面，呢度火炙得細心，魚肉燒得夠耐，油脂更加突出
夢の丼 $298
多個品種嘅刺身，賣相吸引，刺身同飯比例差唔多一比一，帆立貝大大粒唔腥，除咗一件件嘅刺身，仲有火炙三文魚蓉、松葉蟹，加多種口感。 值得一提，醋飯用咗赤醋飯，顏色啡紅色，不過唔會過濃味，比平時白醋飯酸味冇咁重，味道多啲層次。
花錦魚生丼 $188
呢個丼飯同樣用咗赤醋飯，以角切什錦刺身為主，有三文魚子、三文魚、赤蝦，灑上櫻花蝦有脆脆口感。
整體來講，呢間小店食物質素唔錯，性價比幾高，店員幾細心，留意到客人冇哂茶，主動幫客人加熱茶。
===============
夢の丼 (西環)
📍西環西營盤皇后大道西513號尼斯花園地下A舖
