三希樓 (Closed)

工作實在太忙，所以每日夜晚果餐去搵好野食就成為我最好嘅放鬆方法😂位於半山以川菜聞名嘅三希樓第一間分店開咗係銅鑼灣 Time Square，咁就腳就當然要去捧下場！雖然今晚呢餐整體上都幾好食，但最最最好食就一定係呢個「蛋黃炒南瓜」，咸蛋黃就好似唔使錢咁樣密密麻麻覆蓋係南瓜嘅表面！入口首先係陣陣咸香，南瓜咬落鬆軟又充滿甜香，味蕾夾雜住半咸半甜感覺，超好味道😍再嚟推介呢個足料嘅「鮮人蔘燉雞湯」，好夠火喉，燉到雞骨都可以化開，好滋補😍我對動物內臟真係麻麻地，不過見到朋友食呢個「川鹵鴨舌」食到勁滿足，聽講滷得幾入味，食落去仲有陣陣香料味道，有啲麻又有啲辣，好似幾唔錯！紅油炒手細細粒~要均衡飲食當然要點個菜，雖然個「啫啫蝦醬通菜煲」無啫啫聲，但都算幾惹味，送飯一流😋👍晚市有得叫點心又係好吸引，點埋「千層馬拉糕」同「棗茸千層糕」當係甜品，個紅棗糕正正常常幾煙韌又唔會太甜；馬拉糕個樣唔靚仔唔大隻，但就食落有驚喜，做到介乎馬拉糕同蛋黃千層糕(唔知係乜？舊式茶樓名物，超好味！🤤) 之間，甜香鬆彈樣樣足🤩決定咗下次再過嚟試埋佢個麻辣邊爐，應該幾正😍