老馮茶居 (大棠路)

呢間元朗人氣點心小店，食物出色，裝修有特色，賣點係老香港情懷，假日閑閑地要等個半鐘至兩個鐘。今次閑日下午2點去到，唸住過咗繁忙時間唔使等咁耐，但都等咗35分鐘。不過據聞茶居會擴充，攞埋隔離鋪位，10月尾裝修完，希望到時等位唔使咁耐。一般茶樓飲傳統中式茶，但呢度可以叫奶茶、檸檬茶，我哋揀咗中式茶。我哋3個人有細路，點咗5個點心。*****炸雲吞細路鐘意食，每次嚟老馮都必點，炸得好脆，蝦好大隻，爽脆滑嫩，正！****叉燒腸皮薄餡靚，腸粉滑捋捋，叉燒好重料，腸粉身形肥嘟嘟，咬落去好有滿足感。****牛柏葉好入味，好爽口，冇其他豆卜、蘿蔔配料墊底，成碟都係牛柏葉，誠意又老實。**燒賣正正常常，唔算有驚喜。***魷香肉餅飯即叫即蒸，等咗25分鐘先上，飯加咗豬油，好香，好味！但唔記得影相。😅因為趕時間，肉餅飯食唔晒，要打包。提醒一下，打包點心盒size好細，1蚊1個，如果唸住打包，可能要用幾個盒。建議自帶餐盒，支持環保。