非凡小廚 (Closed)

病一場休息左一陣又出山了，夜收工的晚上，想簡單食點小菜，渣車到土瓜灣睇下有無快靚正的好野食。去到北帝街有位泊車，剛好停在非凡小廚門前。好唔簡單的店名令我地產生左一試的衝動。內裡裝修唔算豪華，但都企理，格調是頗傳統的中式小店。小菜款式都幾多，有部分確係幾特別，配合非凡的店名。先揀左一個中華四拼，一個價錢可以自由選擇四款自己鍾意的冷盤，真好。拼盤都好足料下，四個人都夠食。我最鍾意海哲，爽口香甜，好開胃。石鍋蒙古羊真係用鐵板上的，熱辣辣好夠鑊氣。羊肉用三色椒炒香，保持到嫩滑，唔錯。粉絲牛肉鍋係我最鍾意食的小菜，呢幾日病左食唔到野都好掛住佢。呢度的粉絲牛肉鍋配料香料只用小顆粒，反而主角粉絲有一大個，值得一讚。牛肉都好多，牛味濃好好食，但粉絲吸收哂肉汁的精華，最吸引到我。出街食飯盡可能我都會叫一碟蔬菜，務求健康一點。呢度的大姐好好，時蔬比左好多我地選擇。我提出想食瓜類時，佢仲介紹我食蒜蓉蒸茄子，特登做一道菜，但只係收我時菜價。呢種人情味，唔係度度都食得到！而茄子都無令我地失望，同樣大大碟，而且蒸得火候剛好，熟透但又無變爛。清清地總結一餐飯，估唔到出街食飯都會有媽媽煮飯比我食的感覺。