一字記之曰心 (Closed)

今晚想試新野，又想食得特別d，經過尖沙咀科學館道見到呢間新開既小食店就膽粗粗入去試下，其實完全係俾小食店個名吸引左，“一字記之曰心”，個名好長但好特別。查實有咩食呢？大部分嘅小食都係炸物，都有串燒，魚蛋同丸。小食基本上賣$18一份，兩款平啲賣$34，三款再平啲只要$48。我哋一行二人，叫左三款小食再加一份薯條分享。等左十分鐘左右就有得食。食店冇座位，要出去揾位食。脆炸金針菇天婦羅，脆皮懷舊炸鮮奶，極尚可口椒鹽雞軟骨 $48脆皮懷舊炸鮮奶一件一開二，外脆內軟少少流心唔過甜。極尚可口椒鹽雞軟骨炸得香脆可口，最欣賞佢啲椒鹽夠輕手，唔會過鹹，而上面只係灑左少少七味粉調味。如果啲雞軟骨大粒啲就好啦。脆炸金針菇天婦羅 一大一細。我第一次食金針菇天婦羅，菇身有啲難咬開，而啲菇條好似炸粉多。炸完上面再灑上少少七味粉。香口辣味薯條 $38自選醬汁配薯條有芝士肉醬，蜜糖芥末，煙肉車打芝士，黑松露，我哋揀左香口辣味。店員將啲炸好嘅薯條放喺隻大碗度加上香口辣味粉，再蓋上另一隻碗之後shake shake。薯條唔粗唔幼，炸得香脆，香口辣味粉唔太辣，好似北京燒羊肉串落嘅七味粉。食呢d小食好香口，不過唔可以成日食。