功夫點心 (Moved) New Location

同朋友行街行到係時候要醫肚，見福榮街呢間新食店就入去試下，我又好耐冇去點心專門店，而朋友話未試過夜晚食點心。一坐落，侍應問我地飲乜茶，咁我就叫左壽眉，結果侍應比左一壼茶來，相反其他專門店多數都係一杯杯上，要就請侍應再倒茶。我再睇茶位每3蚊，都ok喎! 加多1蚊自己飲幾多都得，唔駛成日叫侍應倒茶。我同朋友兩個人共叫左五款點心，包括酥皮香麻蘿蔔餅、蒜蓉蒸排骨、鮮蝦荷葉飯、鮮蝦菜苖餃同叉燒蒸腸粉。菜苖餃只有3件，餃皮厚左少少，餃皮QQ，菜苗都算不錯。 鮮蝦荷葉飯味道較淡，白飯冇味，蝦都係冇味，唔掂。酥皮香麻蘿蔔餅鬆脆可口，蘿蔔絲清新，味道香口、好味，可惜油膩。叉燒蒸腸粉同蒜蓉蒸排骨都係正常之選，同平時酒樓差唔多，冇乜驚喜。排骨算瘦，底舖左芋頭。總結功夫算係深水埗區貴價的食店，尤其福榮街食肆林立，以呢個價錢係深水埗可以食更豐富了。我平時係上環或灣仔食點心都係呢個價錢，所以試一次便夠。