家賀屋刺身寿司專門店

尋晚終於去咗灣仔家賀屋刺身壽司專門店，真係完全冇失望！一入到去已經覺得成間舖好有日本feel，坐得又舒服，啲職員又好有禮貌。今次叫咗活伊勢龍蝦刺身拼盤，有半價優惠，真係勁抵食！啲龍蝦肉超彈牙，鮮甜到不得了，啲刺身全部都係厚切，食落又新鮮又滿足。油甘魚刺身都好正，油香滑溜溜，厚厚切落去好有口感。日本鯖魚照燒壽司燒得好香，魚味好突出，壽司飯比例啱啱好。醬燒油甘魚魚頭都幾出色，啲肉夠滑，醬汁好惹味，撈飯一流。另外叫咗海鮮茶碗蒸，滑到好似布甸咁，入面啲蝦、魚肉都好鮮甜。飲返杯一番榨生啤，又冰又夠爽，配刺身壽司一流！講返甜品，叫咗椰子雪糕，朋友仲同店員講可唔可以幫我畫隻貓貓落個碟度（計枱個時要講同俾$200 訂），點知師傅真係畫到好靚，成隻貓貓超可愛，完全係做到「pawfection」！真係打卡一流，差啲唔捨得食添！今餐埋單$1300，計埋服務費，質素同埋體驗都對得住個價錢。推介比鍾意食刺身壽司嘅朋友，下次可以試下叫師傅畫其他cute cute嘅嘢，真係會有驚喜！