三新冰室的裝修走東南亞風，座位闊落；用餐區中間有一棵會發光的樹，頗有特色。
午餐主打的都是東南亞菜，另外還有天天新款的中菜及港式菜。
午餐的餐牌有很多可以自選的項目，可以Fusion到咖喱配天使麵，或肉骨茶鮮牛米粉
聽落好似有啲伏，不過同行友人就偏向難度挑戰！選了咖喱牛腩天使麵；而我的選擇則比較平實：肉骨茶一字泡飯。餐飲兩杯凍檸樂～
罐裝汽水連冰底，檸檬也很清新，雖然跟餐要加5蚊，但也算值得。
咖哩牛腩天使麵：分量意想不到地多，估唔到連牛腩超過十舊！咖喱香濃又惹味，配天使麵食落口都唔會覺得騎呢。牛腩炆得夠腍，50蚊咁大碟真係抵到爛⋯⋯
肉骨茶一字骨泡飯：一字骨長過我隻手指，仲要有成6、7條咁多，初時都驚會好似煲湯排骨咁鞋，但又再次估佢唔到咁腍，仲幾入味添！湯底仲有杞子、紅棗、豆卜，濃湯滲出淡淡的藥材味，泡飯啱啱好！
不過白飯嘅份量真係超多，身為麻甩佬嘅我都食剩三份之一。
兩個人都飽到裂，埋單先一百頭，真係非常超值！
