叉燒大王

Open Now

Now Closed

有個好耐冇見既中同約我今日食飯，佢搵左間係佢屋企附近既餐廳，雖然遠遠地，但都應承左佢，去左沙田。聽個名以為係一間餐廳，但去到發現原來似係走中菜館路線。睇店名同餐牌都似係主打叉燒。其他菜式都影得幾近鏡同逼真。「餘韻悠揚」落左單後叉燒好快就送到，見到個樣已經覺得勁吸引，汁唔會太多，淋左小小係叉燒上面，覺得唔夠點返個汁。食落個肉係肥瘦分佈好均勻，油脂部分唔膩，有小小爽脆口感。瘦既部分好軟身，而且咬落肉汁多，唔柴。佢係少有既叉燒做到吞左落口後，仲有陣豬油香充斥住個口。果然招牌菜真係冇得頂！！！「固若金湯」朋友點既浸娃娃菜佢自己就好鍾意食，話呢啲夠嚼勁既菜好對佢胃口。不過我個人就偏向鍾意食啲較腍既娃娃菜。湯頭幾清，唔係死鹹，帶淡淡金華火腿味，整個菜式算幾夾。如果娃娃菜可以唔切，改為一瓣瓣咁整，再煮耐小小，我估應該會好岩我胃口。「破舊立新」用鹹蛋黃做炸皮既，多數都係配蝦，之前成日食黃金蝦，今日食呢個黃金鮮魷，感覺幾新鮮同特別。出面層皮唔厚，但蛋黃味幾出。魷魚個量亦都唔少，算係幾抵食。咬落個味有啲似平時酒樓點退炸魷鬚既昇華版，炸皮、魷魚都高級左咁。呢個拎黎做餸食飯都幾正！