茶墨 (Closed)

最近幾年, 香港既飲品店開到成行成市, 一直以台式飲品連鎖店為主。今日, 竟然係The One 試到一間特色飲品店 !!店名叫茶墨,原來喱到主打水墨風飲品, 飲品既外表就好似一幅水墨畫咁, 岩哂鐘意打卡既女仔。我同朋友簡左麻糬芝麻烏龍鮮奶茶,同埋乾檸柚子茶蜜，再加上一件日本奶茶蛋糕, 打算去海傍享受一個悠閒既下午。麻糬芝麻烏龍鮮奶茶,對我黎講特別有驚喜, 平時珍珠同芋圓就食得多, 好少有飲品入面會加入麻糬, 勁岩麻糬控。麻糬芝麻烏龍奶茶入面個種既芝麻香味, 配合埋煙煙韌韌嘅麻糬, 就好似一杯飲得既甜品, 但同時又唔會太甜太有罪惡感。有時, 因為疫情原因想好好地坐低食個甜品都好難, 喱杯野飲真係滿足左我好想食芝麻糊既心, 哈哈。水墨風既飲品仲有另一杯係麻糬芋泥茉莉鮮奶綠, 都係超想試, 不過今次叫左蛋糕, 飲唔哂, 留返下次再試。另一杯野飲係乾檸柚子茶蜜, 聽落好似好普通, 但係作為食完後解膩既飲品真係一流。特別鐘意茶墨用乾檸, 檸檬既香味更加突出同埋帶有一種微微既澀味, 值得一試。因為本身好鐘意茶味產品, 所以奶茶蛋糕都幾岩我口味, 蛋糕比較輕盈, 岩哂怕肥又好想食甜品既女仔。