百味川 (Closed)

疫症期間，好耐無出去行街，今日同閨蜜👭出嚟女士購物天堂葵涌廣場shopping🛍，平時多數會喺頂樓嗰層掃街，今日試下喺地下嗰層覓食，原來都有正嘢食，呢間百味川專門食川菜🌶，啲嘢食又平又正，如果鍾意食辣嘅朋友仔就絕對啱晒，不過佢都有唔辣嘅嘢食㗎。啱啱好2點半，仲有下午茶餐添，$18有蒜香皮蛋，比平時平成一半，雖然份量係少啲，但係絕對夠食。蒜香皮蛋中間夠晒多蒜蓉🧄，一口皮蛋，一口蒜蓉，正呀！不過食完真係唔敢講嘢🙊~ 你明嘅另外下午茶餐家鄉紅燒肉米線比正價又平7蚊，其實已經好大碗，紅燒肉炆得好稔好入味，脂肪唔會過多，湯底夠濃。百味小鍋米線有幾款湯底，有清湯、酸辣(+$2)、麻辣🌶(+$2)、蕃茄🍅(+$2)、蕃茄酸辣(+$4)，我揀咗清湯，湯底酸酸哋，感覺好醒胃。餸都好多，有雞肉、牛丸、麻辣豬肚同豆卜。炸墨魚丸🍡炸到金黃，又大粒又彈牙，點少少泰式辣醬食都幾好味！炸韭菜餃好少機會食，食落熱辣辣，咬落去好多韭菜，餡料好豐富。好鍾意飲恐龍華田，凍冰冰嘅華田加上華田粉喺面，雙重口感，正呀!店舖仲搞咗個齊心抗疫活動😷，醫護人員出示有效證件可享特別8折優惠。而另外外賣自取亦有優惠9折。