先叫咗個「青蔥芝麻拖羅蝦片」，脆卜卜嘅脆片撈住拖羅蝦肉，芝麻香夠曬濃郁，開胃一流！跟住個牛腹肉200克，切開粉紅色超juicy，配埋烤番茄同南瓜，油脂香搭蔬菜清甜，成個組合好balance。
飲品揀咗Wonderland同Violet Sangria，前者係清新抹茶味，後者果香味夠重，微醺唔會太甜，好適合女仔飲。主食嗌咗墨汁意大利粉，巴馬臣芝士香撲鼻，炸魷魚彈牙，連埋墨汁粉嘅鹹香，食到舔舔脷！
最後上嘅Garden Party Croffle，牛角包waffle外脆內軟，淋滿creamy醬料加新鮮士多啤梨，甜而不膩，係完美收尾。
兩個人性價比算唔錯啦，侍應態度幾好，出餐都算快。呢間嘅fusion菜唔會太花巧，味道都幾有誠意，想hea住食餐好嘅，呢度值得一試。
