一入門口就有驚喜
呢個水產櫃, 放滿唔同種類嘅鮮魚, 條條都亮晶晶
睇到我好有衝動想直接喺度點條做刺身呀。
仲有活生生嘅貝殼類
, 用作濱燒就啱曬啦。
源自日本嘅濱燒 (浜焼き), 當地解作: とりたての魚介を浜辺で焼くこと。意思係直接喺海邊, 將新鮮捕獲嘅海鮮即烤即食。
呢個濱燒盛合, 新鮮嘅程度可以媲美即場捕獲, 特別係鮑魚, 放上烤爐後仍然不停舞動, 非常生猛。師傅純熟地將鮑魚燒至乾身。 從活生生撈起 - 清洗處理 - 濱燒 - 到放入口中, 整個過程10分鐘都唔洗
。
炆鮑魚就食得多, 乾烤真係第一次食！抱著懷疑嘅心情, 一啖放入口
！有驚喜！！！烤乾後嘅鮑魚邊位微焦, 咬落肉質有回彈力, 口感極佳, 仲帶點天然海水鹹味, 不需多餘調味。
蠔肉肥美圓潤, 烤蠔時間恰到好處, 令肉質保持嫩滑。大蜆軟滑多汁, 鮮味十足。帆立貝肉質帶勁, 裙邊爽口。
魷魚鬚爽脆鮮甜, 鬚上一粒粒吸盤烤乾後帶點焦脆感, 加上牛油香氣, 滋味無窮。濱燒果然係最能帶出海產原始鮮味
。
刺身同樣出色, 每款都水潤、有光澤, 係看得見的新鮮
！
赤矢柄就係水產櫃中擁有細長劍咀, 魚身長長, 鮮紅色嘅一條。佢嘅魚肉水嫩白滑, 脂肪不多, 肉質韌度較高, 適合做薄切刺身, 不過我就揀咗厚切, 特別鐘意食落啖啖肉嘅口感, 細味清甜, 充滿鮮味。
鯛魚入口細膩柔軟, 散發微微蜜柑果香, 味道相當獨特, 值得一試。
呢座由一瓣瓣馬糞海膽疊成嘅小山, 夠曬矜貴啦掛
！鮮橙色嘅海膽紋理分明, 口感細緻綿密, 入口先湧出香醇甜味, 細嚐再微微回甘, 齒頰留香。
精緻可口嘅海老天婦羅, 外層脆漿厚薄適中, 香脆而不油膩, 內層鮮蝦彈牙爽甜
。
橙紅色嘅蟹籽晶瑩通透, 非常搶眼, 粒粒都脆卜卜, 喺口中爆發出甘香魚油
。軟滑嘅牛油果包裹著薄薄一層飯, 最內層嘅軟殼蟹脆中帶軟, 層次豐富。
整體上, 餐廳用料新鮮, 真材實在, 店員親切細心, 有問必答, 對食材非常了解。整個用餐體驗滿心滿足, 讓人印象深刻。
值得一提！除一般餐牌外, 餐廳仲會根據時令、來貨 , 每日更新廚師推介餐牌, 好似我哋今日食到嘅赤矢柄刺身 & 蜜柑鯛魚刺身, 就未必日日有啦。點菜前可以先請侍應推介一下。
