一樂烏冬 (Closed)

行開長沙灣見呢間店幾有格調就入嚟試下。雖然店舖面積比較細，但入到去感覺都坐得舒服，而且唔會覺得大油煙味。餐牌好精美，而烏冬嘅配搭好多元化，可以自由搭擇主菜、湯底，而湯底好有特色。而呢度主打手打烏冬，我地當然要叫黎食下啦。先揀咗主菜沖繩豚·軟骨煮，然後選擇湯底「新鮮」，即係每日鮮製鯛魚濃湯。烏冬好大碗，煮得軟身得嚟唔會爛，好入湯底味。而個湯底魚味夠出，亦很濃郁。日式炸雞，炸得表皮好脆，炸粉唔會厚身，肉質肥厚，食落啖啖肉，再配合沙律醬無咁漏。松葉蟹膏茶碗蒸，蛋蒸得滑溜，唔會過熟，再配合蟹膏嘅香氣帶有咸香，再有松葉嘅草本味好清新，食過返唔到轉頭！最後就係沖繩黑糖蕨餅，蕨餅好軟熟，食到黑糖嘅清香味道，配埋灑面嘅黃豆粉，又係少甜，好清新。