和牛燒肉‧純

呢排做嘢咁辛苦，男朋友話獎勵下我帶我去尖沙咀食好嘢，原來係食我最愛嘅日本燒肉。嚟到呢間和牛燒肉純，睇個名就知專門食日本國產和牛啦，餐牌嘅選擇好多，有唔同嘅和牛部位，可以按份量同喜好自己選擇。先嗌咗一客野菜酢物作為前菜，入口清新開胃，醋汁香口，沙律菜同青瓜都好爽脆，令人期待之後嘅食物。我哋一共嗌咗四款肉類，分別係和牛肉眼、牛排肉、上牛排肉同埋豬五花肉。擺盤已經值得俾Like，擺得好有心機又夠精緻，睇見都心心眼。首先食嘅和牛肉眼油脂非常豐富，肉質佈滿雪花，入口即溶，簡單點少少鹽已經帶出肉味。牛排肉同牛上排肉味道香濃，比肉眼軟熟嫩滑，入口滿滿肉汁，加埋店家特製嘅燒肉汁，真係好好食。豬五花嘅肉質就好爽口，雖然望落好似較肥，但入口嘅賭脂肪一啲都唔膩，燒得焦香十足！而男朋友同我分別嗌咗威士忌梳打同桃梳打，桃梳打入面有粒粒桃肉，桃味香甜，好啱女仔飲，而且同肉類都幾夾，去除飽膩感。值得一讚嘅係環境私隱度高，坐得舒服，爐頭抽風好強，食完都唔會令啲衫有燒肉味，餐廳服務都細心。呢餐飯人均7百左右，但無論食物質素同環境都值得，下次一於再同男朋友嚟拍拖！