風雲丸 (Closed)

同朋友去完書展之後，肚餓去銅鑼灣搵野食，我地兩個人都係沾麵愛好者，每次約出黎都係食沾麵咁濟。於是我地揀左間係銅鑼灣幾出名既「風雲丸」黎一試究竟。可能係因為書展既關係，去到門口排左差唔多半個幾鐘左右先入得去，天氣仲要好熱，不過食好野係要付出代價既。沾麵款式選擇唔算多，主要係有原味、辣同埋咖哩魚介沾麵。另外小食都都多款選擇，不過我地淨係試左呢度最出名既原味沾麵，豚骨魚介沾麵($88)＋豚骨魚介味玉沾麵($93)。一上沾麵個時，個湯滾到不斷起泡，以為會熱到好難入口，但配冷沾麵點落去其實岩岩好。沾麵份量都多，叉燒非常肥美，沾麵厚度偏粗，我自己黎講係鍾意食粗麵，所以呢個都幾岩我口味。沾麵有淡淡麥香味，好彈口，魚介湯底感覺味道有點太重。室內裝修都值得一讚，係滿滿既日本風風格，紅白色做主調，感覺好SHARP。如果嫌唔夠飽，其實可以再將食剩既湯加水配肉鬆飯做雜炊食，但係我地兩個都太飽啦，所以無咁做。