Burgerman (欽州街) (Closed)

位於深水埗嘅Burgerman分店，交通便利，最啱行完電腦商場就過嚟食。話明Burger"man"，中午一到竟然係一個女仔經營。平日中午冇客，入面坐位雖然只得幾個面壁位，都算甚為舒服。店舖更設有手套，方便大家衛生地食堡。坐低叫咗個藍芝士堡，套餐連沙律，十分鐘左右就嚟到。首先個堡其實唔大，塊肉雖然有一定厚度，但其實比較細塊。如果食量大可能要叫個雙層堡。包身有烘過，脆脆地。煙肉煎到脆晒，口感極佳。塊牛肉patty肉質唔算頂級，但係仍有明顯肉香，加上冇被完全煎熟，內有紅肉，咬落有肉汁，算係不錯。煙肉同牛肉中間夾咗層藍芝士同紅菜頭，令到成個堡嘅味道非常有層次感，不過呢個配搭，芝士味極重，有時會喧賓奪主，蓋過作為主角嘅牛肉。整體而言，幾好食，對其他味亦有期待。跟餐沙律份量唔算太少，做得幾認真唔hea，值得一讚。