串Grill 自助燒烤專門店 (譽發廣場) (Closed)

天氣咁凍，最啱就係BBQ，但係又好難約到一大班人一齊去，所以嚟呢啲桌上BBQ就啱晒啦。佢呢度嘅款式唔係特別多，但係如果lunch hour嚟講都算係咁。而且就有窗邊卡位坐，啱晒同朋友慢慢燒慢慢食。呢種BBQ方便在只要你擺上去，然之後就可以等食，完全唔使煩，最重要係咁樣燒係唔會咁容易燶。不過呢一度嘅肉類全部都冇調味，所以佢會有晒啲調味料俾你自己加。分別會有孜然粉，辣椒粉，胡椒粉，燒汁同埋鹽。佢呢度嘅牛柳都幾好食，加咗啲孜然粉同辣椒粉，隱約食到大陸嘅味道。而有驚喜嘅係連呢度啲豬肉都唔錯，燒到啱啱好，真係比得上啲牛肉㗎。除咗普通腸仔之外，呢度仲有台灣腸，台灣腸就可以點柚嘅柚子醬，因為佢本身已經有好重黑椒味，加埋甜甜哋嘅柚子醬，竟然出奇地夾。除咗一啲肉類之外，佢呢度有得燒棉花糖，用呢一個方式燒嘅棉花糖全部都好完美，粒粒都外脆內軟，唔會燶。另外當然唔少得我最鍾意食嘅燒菠蘿，大大嚿又多汁，酸酸甜甜好好味。呢度仲有樣比較特別嘅嘢就係原味雞蛋仔，我初頭以為一底底，點知嚟到嘅時候係一粒粒，煙煙韌韌都幾得意。