我同朋友叫左個set叫世味人生，話明世味人生，入面一定係好多味道。
第一個菜係慢煮雲南辣泡椒皇帝帶子, 粒帶子又厚又大粒，好鮮~ 個泡椒唔係好辣，加埋一齊好好味
我好鍾意個象拔蚌夜香花乾貝燉夏瓜湯, 呢個時間飲呢個湯真係好啱, 而且裡面好多海鮮，成個湯勁鮮甜~
私房吉品溏心乾鮑魚扣鵝掌都好好味，鮑魚同鵝掌都好入味
呢個古越龍山20年花雕蛋蒸海蝦好得意，上菜既時候侍應會問你飲唔飲酒，然後佢喺個蒸蛋上面噴左幾下花雕，個蛋好滑好香~
食左一輪野，佢就上左個珍寶珠去清一清個口~ 佢其實係一個sorbet, 我唔知呢個味既英文, 但佢食落似山渣，酸酸甜甜好開胃~
呢個鹹酸菜奶油濃魚湯生煎麒麟魚係我另一個favourite, 佢個湯底係酸菜魚既味，加埋個魚真係好出色。個麒麟魚煎得好香好脆，浸下個湯一齊食, 有2個口感~
之後到砂鍋菌香雞, 呢個雞上之前侍應會喺側邊用砂鍋炒香啲雞再上碟，佢全部都係雞脾肉，個雞好滑好入味~
黎到最後一個鹹點，就係呢個石頭魚蝦米節瓜湯浸鴛鴦米，比起頭先既菜，呢個係比較清淡，但其實個魚湯好濃魚味，為鹹點劃上句號好適合~
終於真係黎到最後一味20年陳皮鐵觀音雪糕~ 呢個真係好好食, 除左面頭既雪糕，下面仲有一層鐵觀音味既啫喱，2個mix埋一齊食好正!
今晚完全係極大享受，呢度樣樣野都好好食! 所有野都perfect!
