估唔到喺美孚新邨呢個老牌屋苑入面都會有一間咁靚嘅Cafe，入面環境非常寬敞，簡約嘅設計令人感覺舒適。
雖然只係一間小小嘅咖啡店，估唔到佢都有好多唔同款式嘅主食同甜品俾客人選擇，當然仲有各式各樣唔同口味嘅咖啡。
呢度嘅咖啡仲可以免費轉低脂奶或燕麥奶。
喺另一個角落就係一個自助區域，食客可以自己攞飲用水，水入面仲加咗檸檬同薄荷，份外清新。
嚟到cafe當然就飲番杯咖啡，揀咗焦糖脆脆鮮奶咖啡，奶泡打得細緻綿密，面層承托住幾顆焦糖脆脆，而待一會就會慢慢溶化入奶泡內，整個過程充滿藝術色彩。
抹茶鮮奶同樣有幼滑嘅奶泡，而且帶有豐富嘅抹茶味道，最鍾意佢唔太甜，抹茶控必定大愛！
朋友話呢度嘅軟殼蟹蕃茄意粉好出名，軟殼蟹係原隻蟹上，坐立於蕃茄意粉之上，氣勢十足，而蕃茄意粉入面有好多雜菇，果然冇介紹錯！
另外仲叫咗疏乎厘pancake，揀咗要榛子味，榛子外面沾咗脆糖，食起上嚟非常香口，混合忌廉同榛子碎一齊食，配搭得宜而且又唔太甜。
另外仲叫咗Tiramisu，呢度嘅Tiramisu造型已經夠晒特別，四四方方，總共有兩層ladyfingers，滲著咖啡酒香，味道獨特，同一般店所做嘅出品好唔同。
呢間cafe雖然位處於民居之內，但仍旺中帶靜，有時落嚟放空一下都係一個好選擇。
