今日趁住天氣好，又係閒日，去左呢間係西環海邊的Arabica朝聖。係好早之前係中環IFC分店已經飲過佢既咖啡，啲咖啡唔酸，並帶有柔和既香氣，幾啱一啲唔好飲完咖啡，成口咖啡酸味既女仔飲。而今日到訪既原因係，係海邊 打•卡！門口純白色，有大大個logo，好簡約乾淨的感覺。淨係門口既位置都有好多人排住影相呢！
店舖內裝修十分日系，以白色木系擺設為主，基本上係任何角落影你手上杯咖啡，都會有種小清新的感覺。
Arabica係一間專賣咖啡的coffee shop, 無其他小食，所以menu都只係得一頁。今次叫左兩杯野飲，一杯latte，一杯matcha latte。呢道一般用明治奶沖咖啡的，唔飲得正常奶的話，加$5都有其他款既奶選擇: 豆奶、杏仁奶或燕麥奶。
Iced Caffe Latte (single origin) ($50, tall) 咖啡豆味道一貫的香、滑、順口，aftertaste唔會太強，甜甜的好易入口。略嫌奶的份量稍為多左啲，口感厚返少少會好飲好多。
Iced Matcha Latte ($60) 來自日本的咖啡店，都帶黎日本特產抹茶。抹茶粉唔澀口，味道同咖啡一樣，唔濃烈，同奶混和得幾平衡。
呢個既無敵大海景真係舒服到可以令人係度坐半日。店內有兩層，好可惜當日2樓裝修中，否則我相信係2樓既景觀更開揚舒服!
