響 - Hibiki 日本燒肉 (Closed)

響絕對係我食過最多種類嘅燒肉放題，一坐低店員就會送上刺身拼盤同龍蝦，刺身非常之新鮮，而且部份係任食嘅。之後再會送一個燒肉拼盤，入邊有齊豬牛雞，每種肉類上面都會有一個牌仔，好窩心，咁就唔怕唔知道想再叫邊種，我最鍾意嘅係佢哋嘅和牛胸腹同骨付雞肉腸，和牛牛味香濃，而且油脂分布好平均，就算燒耐左都唔會韌，雞肉腸係用免治雞肉，入邊嘅肉唔會爛晒，好有咬口，而且調味啱啱好。另外仲有各種嘅海鮮同肉類，海蝦有手掌咁大，仲有平時最鍾意食嘅燒雞皮。佢哋仲有紅白酒同燒酒任飲，而且雪糕都係任食，以品質來講絕對可以回本。