鳥海山鐵板燒 (Moved) New Location

朋友最近轉咗去長沙灣返工，今日就約咗佢敘吓舊，選址鳥海山鐵板燒。餐廳入面空間感十足。我哋準時六點到達，已經有幾枱客準備進場。除咗有餐牌，牆上面仲有黑板介紹是日精選，我哋就選擇咗車海老鐵板套餐(2人前)。落單後店員先奉上沙律，生菜配蕃茄味道清新。餐牌上顯示銀鱈魚會轉成比目魚，比目魚兩邊燒得甘香，味道絕對媲美銀鱈魚。鐵板燒大蝦已經起晒肉，擺盤都好精緻。安格斯牛肉將表面燒到帶點脆邊，而入面仍然保持鮮嫩，配以炸蒜片味道唔錯。食鐵板燒都不忘食啲蔬菜，野菜炒得香口，美味又健康。最後奉上炒飯，炒得金黃色，而且米飯粒粒分明。味噌湯入面又有昆布同豆腐，湯底亦唔會過鹹。